പന്തളം:തപ്പിന്റെ താളത്തിനൊത്ത് ചുവടുവെച്ച്, പച്ചപ്പാളയിൽ കോലമെഴുതി, കാലനും മറുതയും കളത്തിലിറങ്ങി. വ്യത്യസ്തതകൾ നിറഞ്ഞ കേരളപ്പിറവി ദിനാഘോഷം പൂഴിക്കാട് ഗവ. യു.പി. സ്‌കൂളിലെ കുട്ടികൾക്ക് മറക്കാനാവാത്ത അനുഭവമായി. മാതൃഭൂമി-സീഡ് ക്ലബ്ബിന്റെ നേതൃത്വത്തിൽ നടത്തിയ ക്ലാസിലാണ് കുട്ടികൾക്ക് നാടൻകലകളെ പരിചയപ്പെടുത്തുവാനായി പടയണി അവതരിപ്പിച്ചത്. കുരമ്പാല ഗോത്രകലാ പടയണി ഫൗണ്ടേഷന്റെ കലാകാരൻമാരായ നാടൻകല അക്കാദമി ഗുരുപൂജാ അവാർഡ് ജേതാവ് ശാർങ്‌ഗധരൻ ഉണ്ണിത്താൻ, വജ്രജൂബിലി ഫെലോഷിപ്പ് നേടിയ കിരൺ കുരമ്പാല, കോലമെഴുത്ത് ആശാൻ ടി.ആർ.വിഷ്ണു, എന്നിവർ പടയണി കോലങ്ങളെ കുറിച്ചും ഉപയോഗിക്കുന്ന വാദ്യോപകരണങ്ങളെ കുറിച്ചും കോലമെഴുത്തിൽ ഉപയോഗിക്കുന്ന ചായങ്ങളെ കുറിച്ചും വിശദീകരിച്ചു.