: അപ്രതീക്ഷിതമായി വീട്ടിലകപ്പെട്ടപ്പോഴും വിദ്യാർഥികൾ പരിസ്ഥിതിയെ കൈവിടാതെ നടത്തിയ പ്രവർത്തന മികവാണ് തിരുനല്ലൂർ ഗവ. ഹയർ സെക്കൻഡറി സ്കൂളിനെ ചേർത്തല വിദ്യാഭ്യാസ ജില്ലയിലെ ഹരിത വിദ്യാലയം രണ്ടാം സ്ഥാനത്തിന് അർഹമാക്കിയത്. ശാസ്ത്രത്തെയും സാങ്കേതിക വിദ്യയെയും സന്നിവേശിപ്പിച്ചാണ് സീഡ് പ്രവർത്തകർ മഹാമാരി കാലത്തെ നേരിട്ടത്. വെബിനാറുകളിലൂടെ അറിവുകൾ പങ്കിട്ടവർ ജൈവമാഗസിൻ പോലും തയ്യാറാക്കി. വീട്ടിലിരിക്കേണ്ടിവന്നപ്പോഴും സ്വന്തം മണ്ണിൽ കാർഷികവൃത്തികളിലേർപ്പെട്ടു 

അവർ.  മഹാമാരിയെ മറികടക്കാൻ മാസ്ക്, സാനിറ്റൈസർ, ഹാൻഡ് വാഷ് എന്നിവയുടെ ഉപയോഗത്തെക്കുറിച്ച് ബോധവത്കരണം നടത്തി. ഇതിനായി പോസ്റ്ററുകൾ സ്വയം നിർമിച്ചു. പൂമ്പാറ്റയ്ക്കായി പൂന്തോട്ടം നിർമിച്ച കുട്ടികൾ മാതൃഭൂമി മുൻ മാനേജിങ് ഡയറക്ടർ എം.പി. വീരേന്ദ്രകുമാറിന്റെയും കവയിത്രി സുഗതകുമാരിയുടെയും ഓർമയ്ക്കായി സ്മൃതിവനവും നിർമിച്ചു.

 നാട്ടു മാഞ്ചോട്ടിൽ, എൽ.ഇ.ഡി.ബൾബ് നിർമാണ ശില്പശാല എന്നിവയും പുരസ്കാരനിർണയത്തിൽ പ്രധാനമായി.

:കരുതലിന്റെയും അതിജീവനത്തിന്റെയും പുതിയ പാഠങ്ങൾ പകർന്നു നൽകിയാണ് തമ്പകച്ചുവട് ഗവ.യു.പി. സ്കൂൾ സീഡ്-പരിസ്ഥിതി പ്രവർത്തനങ്ങൾക്ക് ചേർത്തല വിദ്യാഭ്യാസജില്ലയിൽ ഹരിതവിദ്യാലയ പുരസ്കാരത്തിൽ മൂന്നാം സ്ഥാനം കരസ്ഥമാക്കിയത്. കോവിഡിനെതിരേ വിദ്യാർഥികളെയും രക്ഷാകർത്താക്കളെയും ബോധവത്കരിക്കുന്നതിന് ആവശ്യമായ പ്രവർത്തനങ്ങൾ സംഘടിപ്പിച്ചു. കരുതലിന്റെ ഭാഗമായി സഹപാഠികളിൽ സാമ്പത്തികമായി പിന്നാക്കം നിൽക്കുന്നവർക്കു സന്നദ്ധ സംഘടനകളുടെയും സ്ഥാപനങ്ങളുടെയും പഞ്ചായത്തിന്റെയും സഹകരണത്തോടെ ടി.വി. തുടങ്ങിയ പഠനോപകരണങ്ങൾ വിതരണം ചെയ്തു. സ്കൂളിനടുത്തുള്ള വീടുകളിലും കടകളിലും സാനിറ്റൈസറും മാസ്കുകളും വിതരണം ചെയ്തു. അടച്ചിടൽ കാലത്തിന്റെ വിരസതയകറ്റാൻ കൂട്ടുകാരുടെയും അധ്യാപകരുടെയും മുന്നിൽ തങ്ങളുടെ കഴിവു തെളിയിക്കാനുമുള്ള അവസരം സ്കൂളിലെ എല്ലാ കുട്ടികൾക്കും ലഭിച്ചു. സ്കൂൾ റേഡിയോ ആയ 'റേഡിയോ തമ്പക' യുടെ ആഭിമുഖ്യത്തിൽ എല്ലാദിവസവും കുട്ടികൾ വിവിധ മേഖലകളിൽ തങ്ങൾക്കുള്ള കഴിവുകൾ പ്രദർശിപ്പിച്ചു. ഹരിത ഭക്ഷണത്തിന്റെ പ്രാധാന്യം മനസ്സിലാക്കി ഹരിത ഭക്ഷണമേള സംഘടിപ്പിച്ചു. മൈക്രോ ഗ്രീൻ, ഹൈഡ്രോപോണിക്സ് തുടങ്ങിയ പുതിയ കൃഷിരീതികൾ കുട്ടികളിൽ പ്രചരിപ്പിച്ചതിലൂടെ കൊച്ചുകുട്ടികളെപ്പോലും കൃഷിയിലേക്ക് ആകർഷിച്ചു.സാമൂഹികബോധമുള്ള ഉത്തമപൗരന്മാരായി വളരാനും സീഡ് പ്രവർത്തനങ്ങളിലൂടെ കുട്ടികൾക്കു സാധിക്കുന്നുണ്ട്. അതിനുദാഹരണമാണ് ആലപ്പുഴ -മധുര റോഡിലുള്ള അപകടക്കെണിയെക്കുറിച്ച് സീഡ് റിപ്പോർട്ടർ അക്ഷര എ.പൈ. നൽകിയ വാർത്തയും അതിന് ഉടനടി അധികാരികൾ എടുത്ത നടപടിയും. റോഡിനോട് ചേർന്നുള്ള  കൈത്തോട് രാത്രി ഇരുചക്രവാഹന യാത്രികർക്ക് ഉണ്ടാകുന്ന ബുദ്ധിമുട്ട് അധികാരികളുടെ ശ്രദ്ധയിൽപ്പെടുത്തിയാണ് നടപടിയെടുപ്പിച്ചത്.

സീഡ് ബോളും ഫലവൃക്ഷവിത്തും നൽകി സീഡ് ചലഞ്ചിന് തുടക്കം കുറിച്ചു. എം.പി. വീരേന്ദ്രകുമാർ, സുഗതകുമാരി തുടങ്ങിയവരുടെ ഓർമയ്ക്കായി സ്മൃതി മരവും സ്മൃതി വനവും നട്ടു പരിപാലിക്കുന്നു. ‌