കുട്ടനാട്: കോവിഡ് കാലത്ത്‌ വീട്ടിലിരിക്കുമ്പോഴും കുട്ടികൾ പ്രകൃതിയെ മറന്നില്ല. പരിമിതികളിൽനിന്ന്‌ പ്രകൃതിസൗഹൃദപ്രവർത്തനങ്ങൾ തുടർന്നു. അത്തരം മികച്ച പ്രവർത്തനങ്ങളിലൂടെ കുപ്പപ്പുറം ഗവ. ഹൈസ്കൂളിന്‌ കുട്ടനാട് വിദ്യാഭ്യാസജില്ലയിൽ മാതൃഭൂമി സീഡ് ക്ലബ്ബിന്റെ ഹരിതവിദ്യാലയം രണ്ടാംസ്ഥാനം നേടാനായി. കൈനകരി പഞ്ചായത്തിലെ ഹൈസ്കൂളിൽ 2020-21 വർഷം കോവിഡ് മാനദണ്ഡങ്ങൾ പാലിച്ച് സീഡ് ക്ലബ്ബിന്റെ നേതൃത്വത്തിൽ നിരവധി പ്രവർത്തനങ്ങൾ നടത്തി. കുട്ടികൾ അവരുടെ പരിസരത്തുനിന്ന്‌ കളിമണ്ണ് ശേഖരിച്ച് മൺചെരാതുകൾ നിർമിച്ചു. ജൈവകൃഷി, വീട്ടിലൊരു പൂന്തോട്ടം, ബോട്ടിൽ ആർട്ട്, കരകൗശലവസ്തുക്കൾ, തുണിസഞ്ചി, മാസ്കുനിർമാണം, വിതരണം തുടങ്ങിയ പ്രവർത്തനങ്ങളുണ്ടായി.  ദിനാചരണങ്ങൾ ആചരിക്കുകയും ‘പ്രകൃതിസംരക്ഷണത്തിൽ കുട്ടികൾക്കുള്ള പങ്ക്’ എന്ന വിഷയത്തെക്കുറിച്ച് വെബിനാർ സംഘടിപ്പിക്കുകയും ചെയ്തു. ‘സുസ്ഥിരജീവിതം ലോവർ കുട്ടനാട്ടിൽ’ എന്ന വിഷയത്തിൽ പ്രോജക്ട് അവതരിപ്പിച്ചു. നിലവിൽ പാരിസ്ഥിതികാവബോധം, പ്രകൃതിസംരക്ഷണം എന്നിവയ്ക്ക് ഊന്നൽനൽകിയുള്ള പ്രവർത്തനങ്ങൾ ആവിഷ്‌കരിച്ചു നടപ്പാക്കിവരുന്നു.