പാലക്കാട്: പരിസ്ഥിതി സംരക്ഷണ പ്രതിജ്ഞ ഏറ്റുചൊല്ലാൻ മാത്രമുള്ളതല്ലെന്ന് എടത്തനാട്ടുകര പി.കെ.എച്ച്.എം.ഒ.യു.പി. സ്കൂളിലെ സീഡ്  പ്രവർത്തകർക്കറിയാം. ശുചിത്വ ഗ്രാമം സുന്ദര ഗ്രാമം എന്ന മുദ്രാവാക്യത്തെ അവർ സ്കൂൾ ജീവിതത്തിലേക്കും വീടുകളിലേക്കും കൊണ്ടുപോയി പ്രവർത്തന പഥത്തിലെത്തിച്ചു. സ്കൂളിലേക്കാവശ്യമായ പച്ചക്കറികൾ അവിടെതന്നെ ഉത്പാദിപ്പിച്ചു. എല്ലാ പ്രവർത്തനങ്ങൾക്കും സമൂഹത്തെ കൂടെ കൂട്ടി.  വിട്ടുവീഴ്ചയില്ലാത്ത ഈ പ്രവർത്തനങ്ങളാണ് എടത്തനാട്ടുകര നാലുകണ്ടം പി.കെ.എച്ച്.എം.ഒ.യു.പി. സ്കൂളിനെ വിശിഷ്ട ഹരിത വിദ്യാലയം പുരസ്കാരത്തിലേക്ക് നയിച്ചത്. സംസ്ഥാനതലത്തിലെ രണ്ടാം സ്ഥാനമാണ്   സ്കൂൾ.  കുട്ടികളുടെയും  അധ്യാപകരുടെയും മികവുറ്റ പ്രവർത്തനങ്ങൾ നാട്ടിലെത്തിക്കുന്നത്.  പച്ചക്കറികൾ ഉല്പാദിപ്പിക്കുന്നതിനോടൊപ്പം, ശുചിത്വ പ്രവർത്തനങ്ങളും ഊർജ-ജല സംരക്ഷണ പ്രവർത്തനങ്ങളിലുമെല്ലാം സ്കൂളിലെ സീഡ് ക്ലബ് ഏറെ മുന്നിലാണ്. മാതൃഭൂമി ഫെഡറൽബാങ്കുമായി ചേർന്നാണ് സ്കൂളുകളിൽ സീഡ് പദ്ധതി നടപ്പാക്കുന്നത്.
പച്ചക്കറി തോട്ടത്തിൽ നെൽകൃഷി ചെയ്യാൻ സാധിച്ചത് കുട്ടികൾക്കെന്നപോലെ രക്ഷിതാക്കൾക്കും ആവേശമായി.  കൃഷിക്കാവശ്യമായ ജൈവ കീടനാശിനികൾ നിർമിച്ചതും സീഡ് പ്രവർത്തനത്തിന്റെ ഭാഗമായി കുട്ടികളുടെ നേതൃത്വത്തിലാണ്.  
പ്രദേശവാസികളുടെ യോഗം വിളിച്ച് ജലസ്ത്രോതസ്സുകൾ വൃത്തിയാക്കുന്ന പദ്ധതി, മഴക്കുഴികളുടെ നിർമാണം, പ്ലാസ്റ്റിക് നിർമാർജന പദ്ധതികൾ, തടയണ നിർമാണം, എന്നിവയ്ക്കൊപ്പം ജലസംരക്ഷണ ജാഥകളും വിദ്യാർഥികൾ സംഘടിപ്പിച്ചു.
നട്ടുപിടിപ്പിച്ച തൈകളുടെ പരിപാലത്തിനൊപ്പം അവയുടെ എണ്ണവും വളർച്ചയും എല്ലാം കൃത്യമായി രേഖപ്പെടുത്തി സൂക്ഷിക്കുന്നതിലും വിദ്യാർഥികൾ ശ്രദ്ധ ചെലുത്തി. ഊർജ സംരക്ഷണത്തിന്റെ പ്രാധാന്യം വിളിച്ചോതിയ ജാഥകളും വീടുകളിലെ വൈദ്യുതി ഓഡിറ്റിങും പതിവാക്കി.